Վերջին նորություններ
Բանակին բանակ են տանում...
Ձեւավորված ավանդույթի համաձայն` Այսօր ՀՀ պաշտպանության նախարար Սեյրան Օհանյանը Երեւանի պետական համալսարանում հանդիպեց բարձրագույն ուսումնական հաստատությունների պրոֆեսորադասախոսական կազմի եւ ուսանողների հետ:
«Զինված ուժերի պատրաստությանը նոր որակ, պաշտպանական բարեփոխումներին հաստատուն ընթացք». այս կարգախոսով առաջնորդվող Հայոց բանակն այս տարի իր ռազմավարական ծրագրին ավելացրել է նաեւ գիտելիքի տարրը:
Պաշտպանության նախարարը, կարեւորելով բանակ-ուսումնական հաստատություններ կապը նշեց, որ գիտելիքի բացակայությունը նույնպես կարող է մեր պետության համար սպառնալիք հանդիսանալ: «Այսօր հարուստ գիտելիքներով եւ խելամիտ մարդկանց աշխատանքով միայն կարող ենք զինված ուժերի հավասարակշռությունը պահպանել հակառակորդի զինված ուժերի քանակական առավելության պայմաններում»,- հավելեց Սեյրան Օհանյանը:
Նա նշեց, որ շատ է խոսվել սերունդների ռազմահայրենասիրական դաստիարակության մասին, եւ այսօր այն դրված է իրատեսական հիմքերի վրա:
«Որքան սերտ լինի կապը բանակի եւ կրթական համակարգի միջեւ, այնքան լավ հիմքերի վրա կլինի ռազմահայրենասիրական դաստիարակությունը, որը ցանկացած պետության համար առանձնահատուկ նշանակություն ունեցող գործոն է»,- ասաց Զինված ուժերի ղեկավարը: Նա պետության դեմ ուղղված սպառնալիք համարեց նաեւ ռազմահայրենասիրական դաստիարակության ցածր մակարդակը:
Պաշտպանության նախարարի հրամանի համաձայն`բարձրագույն ուսումնական հաստատությունների շրջանավարտ ժամկետային զինծառայողներն իրենց ծառայությունն անցնում ըստ իրենց մասնագիտությունների: Դա հիմնականում իրականացվում է կրտսեր հրամանատարական կազմի շրջանում: Նախարարն ասաց, որ սա նաեւ երկրի ղեկավարի ցուցումն է: Իրենց մասնագիտության բարձր մակարդակով տիրապետող նորակոչիկները բանակ են զորակոչվում նշված հրամանի չափանիշներով:
Այնուհետեւ պարոն Օհանյանը պատասխանեց ուսանողների եւ պրոֆեսորադասախոսական կազմի ներկայացուցիչների հարցերին: Դրանք ամենատարբեր բնույթի էին` աշխարհաքաղաքական զարգացումներից մինչեւ ռազմագիտական գրականության տպագրության անհրաժեշտությունը:
Հանդիպման ավարտին ՀՀ պաշտպանության նախարարը ներկաներին շնորհավորեց ՀՀ ԶՈւ կազմավորման 18-րդ տարեդարձի կապակցությամբ եւ մատաղ սերնդի ռազմահայրենասիրական դաստիարակության գործում ունեցած ավանդի, ինչպես նաեւ ՀՀ բանակի կազմավորման 18-րդ տարեդարձի կապակցությամբ ՊՆ գերատեսչական մեդալներով պարգեւատրեց տարբեր բուհերի պրոֆեսորադասախոսական կազմի որոշ ներկայացուցիչների: Իսկ առաջադիմությամբ աչքի ընկած մի շարք ուսանողներ ստացան արժեքավոր նվերներ:
Նախագիծ
